فوليستر
ليله الاربعاء
12-3-2026
الخميس
5:06 ص
صحيت بدري.
فتحت أبلكيشن Claude وسألته:
إزاي أبقى relaxed؟
قالّي:
خد نفس عميق 4 ثواني وكررها 4 مرات.
اعمل ستريتشات.
قوم اتمشى.
قفلت.
فتحت يوتيوب ميوزك.
كتبت: relaxed music.
ضغطت تشغيل.
الموسيقى شغالة.
من شوية جالي جرس إنذار على الموبايل:
“احترس من حدوث انفجار وابتعد عن الشباك.”
بعدها بدقايق…
سمعت صوت انفجار.
الفيلا بتهتز.
بقول لزميلي في السكن:
خلاص اتعودنا.
كل يوم بقى في ضرب صواريخ حوالينا.
وبنقارن…
النهارده أقوى من امبارح؟
ولا أهدى؟
بقالنا أسبوع ونص شغالين من البيت.
العشر الأواخر من رمضان.
هل أنا شكّاي؟
طلبت أوردر من تيمو.
قالولي بسبب الحرب هيوصل بعد 20 يوم بدل 15.
دفعته من تمارا على أربع دفعات.
جبت ستريكرز وإكسسوارات للعربية.
امبارح طلبت بطانية جديدة، ملاية جديدة، وطبقة تتحط على المرتبة تخليها أطرى.
من نون.
بس دفعته من تابي.
عايز أحسن رصيدي في تابي عشان الليمت يزيد.
أجيب حاجات أكتر… وأغلى.
عايز أجيب MacBook Pro M5 Pro.
حوالي 10 آلاف درهم.
ممكن خصم 500 درهم بإيميل الشغل.
مميزات Samsung S26 Ultra مغرية.
ليه كل الناس بتجيب آيفون؟
أنا عايز أرجع أندرويد.
مش عايز برو ماكس.
مش عايز برو.
مش عايز آيفون.
نزلت فتحت العربية.
لوحدي.
شغلت الراديو.
لفيت في المنطقة.
رحت أتسحر.
كان نفسي في فلافل… وكرك.
لقيت عند الراجل حاجة حلوة:
لوتس على كريمة وبسكويت.
مش عارف اسمها إيه.
قلتله: هاتلي دي.
رجعت البيت.
دوقتها لزمايلي في السكن.
معايا شيف.
قال: أنا بعمل أحسن منها.
طلعلي من التلاجة حاجة وقاللي دوق.
قلتله: تتوقع سعرها كام؟
قال:
25 درهم؟
15 درهم؟
قلتله: لا… 10 درهم بس.
قعدنا نضحك.
مسحت العربية بالمنشفة.
جبتها امبارح من Wear Mart.
مكان زي مول كبير، حاجات كتير بأسعار رخيصة.
شفت أجزاء من ماتش أرسنال بعد الفطار بشوية.
اتعادلنا في آخر دقايق.
عندي IPTV.
زميلي شغل مسلسل “أفراج”.
أنا بعد ما خلصت مسلسل آسر ياسين ودينا الشربيني، مفيش حاجة شدتني.
في فرق بين مسلسلات “إيجيبت” ومسلسلات “مصر”.
أنا هنا في الإمارات.
مفيش مسلسلات توصف اللي بنعيشه.
مفيش حد يعرف إحنا بنفكر في إيه.
ولا بنحس بإيه.
صورنا على إنستجرام جميلة.
على الأقل أنا.
أنا بشتكي كتير؟
عايز إيه تاني؟
مش عاجبني حالي… ولا عاجبني؟
عايز إجازة أروح تايلاند.
عايز أحس إني حر.
في أفكار كتير في دماغي.
بسميه عندي صداع.
هنا… مفيش ليك رأي.
في بس تاسك تتعمل.
مهمة تتأدي.
مش عايزينك تفتّي.
ولا تبدع.
ولا تحط التاتش بتاعك.
اقعد ساكت.
اسمع أكتر ما تتكلم.
يمكن دي دروس.
بس الواحد بيتعلمها بالطريقة الصعبة.
مكنوش بيدوهالنا في المدارس الحكومية.
أنا أخدتها بالطريقة الصعبة.
عيبي إني مش متقبلها.
مش متقبل إن فيا عيوب.
بين نارين:
كويس إن اللي حواليا مستحمليني.
وبين…
أنا إيه اللي جابني هنا؟
أنا أستحق مكان أحسن.
مفيش وسط.
والساعة دلوقتي داخلة على 6.
والموسيقى لسه شغالة.
والسؤال لسه زي مهوا…
https://music.youtube.com/watch?v=iqLvgC11-Ls&si=GzdGsOmr8FCznja_
هو أنا فعلًا عايز أبقى relaxed؟
ولا أنا خايف أقف لحظة وأسمع نفسي؟
كلام في غاية الجمال
كلام سليم