لو مصمم جرافيك متكملشي في المجال ده
10:58 م
٥-٩-٢٠٢٣
انا مصمم جرافيك
و مصدر دخلي من التصميم
جزء من مصدر دخلي من الورش و الكورسات
لمصحلتي اني اشجع الناس انها تبقي مصممين
انها تكمل و تطور و تعمل فلوس و تنجح
و تشترك في الكورس بتاعي
لكن انا بنصح اي حد انه ميكملشي في المجال ده بالذات لو انتا معانا في مصر
طول عمري كنت بكره المحاضرات
طول عمري كنت بكره الدروس
متخيلتش فيوم اني اكون بدرس او بحاضر
لكن تشجيع الناس و الصدفه هي الي حطتني في المكان ده
و الي برضه مكنتش متوقع انه احبه و احب و انا بشرح و اعلم غيري
و اشوفه بيطور و احده و احده
لكن انا مش بعرف اكذب
مش بعرف اشجع و اقول كملوا هتحققوا احلامكم من المجال ده
كتير من المصممين هيفشلو
و الي ينجحوا قليل جدا
و في الي هيبقي في منطقه متسوطه ولكن راضي بحاله
و الرضا ده من عند ربنا مش سهل يجي لاي حد
و انا واحد من الناس الي الرضا ممكن يجيلي شهر في السنه
و باقي الوقت بعافر عايز اكتر
و دي حاجه حلوه و وحشه في نفس الوقت
فنصحيتي ليك ان الجرافيك مش مجال زي منتا بتشوف في الصور
مش واحد قاعد في كافيه او علي البحر قاعد يشتغل و مش ناعي هم حاجه
اه انا الي بعمل كده و بنزل صور زي كدا
بس ورا الصوره انتا متعرفشي في ايه
متعرفشي الحاجات الي بمر بيها
او اني ابتديت في سن ١٥ بسبب كمبيوتر اهلي جابوه
في ناس تانيه عندها ١٥ و اهلها مجابلوهمشي كمبيوتر
فانا كنت محظوظ
وبرضه حطيت وقتي و مجهودي في الموضوع و مع الوقت جاب نتيجه
اول مبتديت عمري مفكرت في الشغل من نحيه الفلوس
كنت بفكر دايما اني اعمل تصميم احسن
كنت متابع مصممين من كل حته علي بيهانس
و انام احلم اني اعمل تصمايم زييهم
اني اعمل لوجوهات زييهم
امشي في الشارع اشوف لوجوهات و اقعد انقدها
و اشوف في السوشيال مديا حاجات
اقول انا ممكن اعمل احسن منها
لما كانت بتجيلي فرص للشغل كنت برفضها
و اول شركه رحتها و ابتديت فيها
علشان تجربه جديه
وعلشان كنت عايز اخرج من موود القعده في البيت
و قعدت في الشركه فتره حلوه و اتعلمت و كنت وقتها ١٨ سنه
برضه مش ناس كتير بتجيلها فرصه في شركه في السن ده
في السن ده كنت بعمل كل حاجه للشركه
تصميم و فيديوهات و كل حاجه و كنت بطبق هناك
و كنت باخد ٨٠٠ ج
فكنت فرصه كويسه للشركه و فرصه كويسه ليا اني اتعلم اكتر
انا بنصح اي حد انه ميكملشي
لو مفكر انه هيعمل فلوس كتير او هيتشهر من التصميم
لان مش كل الناس بتجيلها ضربات حظ
كام واحد عنده سوشيال ميديا نشطه
عنده يويتويب و فيس بوك و تيك توك و انستا
عليهم يجي نص مليون
٢ او ٣ في مصر في المجال ده
هما الي مش بيفكروا في الفلوس
او بيفكروا ازاي يزودوا الفلوس
لكن كمصمم جرافيك بس في مصر هتعاني في الاول
فمتكملشي لو مفكر انك بعد اول كورس هتاخده هتبقي محترف
لو فاكر بعد كام فيديو هتبقي مميز و مختلف و تطلع تبقي سبيكر كمان سنه
انا عندي ٢٧ س
و حققت احلامي لما كان عندي ١٥ س
لسه عايز احقق احلامي … احلام ال ٢٥ س
الاحلام مبتنتهيش
كل فتره بسال نفسي انا هنا ليه مسافرتش
مع ان كان حلمي و انا صغير اني مسافرشي
اني معلشي زي كل الناس
اني ابقي مختلف و اني اقدر انجح من هنا لو بذلت مجهود و فكرت بطريقه مختلفه
مش عارف ابقي راضي
مش عارف
مع ان كل حاجه متوفرالي
كل حاجه معايا الا حاجه واحده
السنه دي كانت كل حاجه مختلفه
السنه دي حاسس انها الي جمعتلي فيها نتايج السنين الي فاتت كلها
حاسس انها نتيجه ١٠ سنين
السنه دي كنت فيها برا البيت
شايل شنطتي و مسافر
اسافر اي حته
من غير مقول لحد
من غير مسال حد
السنه دي انا عملت حاجه كان نفسي فيها
و هي اني اختار
اختار المكان الي اروحه
دهب , اسوان , شلاتين , القصير ,
اختار الناس الي اقعد معاها
اختار الناس الي تبقي صحابي
و الناس الي تبقي زمايل
السنه دي انا اختارت اني
اشتغل وقت مكون عايز اشتغل
و اختارت اني مشتغلشي وقت اكون مش عايز
السنه دي انا اختارت اني اشيل كل الديدلاينز من حياتي
اختارت اني انا الي احدد المواعيد الي اتكلم فيها
و اختار كمان ان اكنسل المواعيد دي او اجلها
اختارت اني لما اصحي من النوم اقرر
اقرر اعمل ايه اكل ايه و البس ايه
اقرر اني الف حوالين نفسي او ملفشي
كنت مفكر ان الفلوس كل حاجه
و كان معايا فلوس
لحد مكتشفت علشان اطلع ورق الاعفا و الباسبور
هياخد مني ٦ شهور بسبب ظروف خارجه عن ارادتي و الفلوس مفادتنيش بحاجه
اوقات المعارف بتفيد اكتر
دي حاجه اتعلمتها
هي حاجات لا تشتري
انا منصحشي اي حد يبقي زيي
لانك لو زيي حتحس بكل حاجه حلوه و شبه مثاليه
و لكن اوقات كتير حتحس بالوحده لانك صعب تلاقي حد شبههك
مهما سافرت و مها لفيت و مهما اتعرفت علي ناس علي انستجرام
صعب تلاقي حد شبههك او يفهمك
لكن لقيت الي نفسه اكون شبهه
و الي ممكن اتعلم منه
رحله التدوير مع نصك التاني
رحله مستمره مبتنتهيش
اوقات بتمني اني مكنتش مصمم ولا بعمل الي بعمله
اوقات كنت بتمني اكون في وظيفه عاديه و مواعيد عاديه
وتفكير طبيعي و اتجوز حد من المحيط بتاعي و اخلف عيال و اعيش حياه مستقره
يمكن انا بدور علي حاجه مش موجوده
يمكن الاقي ده مع الوقت
واحد صحبي قالي قبل كده انتا مش مصمم انتا اكبر من كده بكتير
قالي انتا فنان
قلتله هستفاد ايه من اللقب فنان مصمم مهندس او متشرد في الشارع
المهم اكون انا و الاقي الي يرحيني
اكتشفت اني بصرف كل الي معايا
و اني معتش بتازم زي زمان
معتش بجري ورا حاجات مش عايزها
اشتري حاجات و اركنها
بطلت العادات دي
في نهايه اليوم و نهايه التنطيط
برجع اقعد علي الاي باد اخلص شغل
شغل روتيني ممل
ده الي بيجبلي مصاريف
و بعمل حاجات بحبها زي الفيديوهات او الافلام او الكتابه
و محدش بيشوفها غير صحابي
و يوم ممكن اوريها للناس و ممكن لا
بحاول اكتب مميزات و ايجابيات
لاني قلت في الاول سلبيات كتيره
لكن في النهايه
مفيش لقب و لا وظيفه تحدد اي انسان
احنا اكتر من كده بكتير
لو انتا عايز تبقي مصمم جرافيك خليك كده بس علشان انتا عايز كده مش علشان اهلك عايزين كده او علشان هيبقي شكلك حلو وانتا قاعدعلي الابتوب و لا علشان عايز فلوس كتير و سفر
ليك الحق انك تجرب
وليك الحق انك تفشل
فحاول تفشل بسرعه
جرب و هات اخرك
لو الدنيا ممشتشي معاك
شوف حاجه تانيه و ريح نفسك
انا عن نفسي بحب ارسم الاشكال
بحب ارسم خطوط و دواير
دي حاجه بتريحني نفسيا
بنسي نفسي و انا قاعد بغير في الالوان
و قاعد بظبط الكيرف لشكل مساحته متعديش ٥ سنتي
هي دي هوايتي الي بنسي فيها العالم و كل حاجه
بحب اعمل فيديويهات
علشان بحب احكي الي مريت بيت و اصيح عن مشاكلي
بحب اختار اغاني و احطها في الفيديوهات
الفيديوهات دي بقت بتتشاف و بقيت تجيبلي مصدر دخل
عرفتني بناس حلوه و مريت بسببها بتجارب عمري مكنت اتخيلها
ادتني الحريه و الاستقلاليه و تشجيع اني اكمل في الي انا فيه
حبيت اللحظات الي شباب صغير يشوفني و يتصور معايا
حبيت اللحظات الي بقولهم فيها كمل في الي بتحبه وربنا هيوفقك
و بعد كل ده
لمده سنه معتش بعمل فيديوهات
معتش بحكي تجاربي
معتش بصيح
لكن بقيت بكتب
وهو ده الي بعمله كل يوم
اقوم البس و اختار اعمل ايه.
اقرر.
يمكن انا بعمل ده لانه عكس الي كنت بعمله طول حياتي
يمكن انا بحب اختار لاني قبل كده كنت مجرد عن قرارات و اختايارت لناس تانيه
لما بطلت اكتر حاجه اخيرا عجبت اهلي
رجعنا تاني لنفس القصه
ولنفس اللحظات الممله و الكلام المكرر
لكن انا عارف انهم بيحبوني و حيحبوا اي حاجه هكونها او هعملها
في النهايه هنموت و مش هيفرق اذا كنا اختارنا
احنا اكلنا اكله بنبحها او اكل موجوده قدامنا
لسه عندي طموح اني اجرب حاجات جديده
عندي حلم اني اسافر العالم
و مش عارف هعمل ده ازاي
بس متاكد فيوم اني هعمله
عارف اني فيوم هلاقي الي بحبه
و عارف ان هنعيش ايام حلوه
وهتبقي فاهماني.
الثيرابيست اخر مره قالي متجيش تاني
بس تعالي مره في الشهر نطمن عليك
و حاول تركز في الشغل شويه اكتر
نفسي اكتب كتاب
و اكتب روايات
نفسي اعمل حاجات كتيره
علشان كده بصحي كل يوم
والبس احلي حاجه
و انزل
و ابتدي يومي
انا حابب حياتي كده
لحين اشعار اخر