عايز اقوم اشم هوا
٤:٥١ ص
١٤- ٩ - ٢٠٢٣
عايز اقوم اشم هوا
و احرك جسمي و اعمل شويه تمارين
و اقف في البلكونه
اشمعنا احساس اني عايز اقوم ده جالي دلوقتي
وقت مجيت افتح النوته. واكتب
منا قاعد من الصبح بقرا و بقلب في حاجات عشوائيه
وبسمع اغاني و محستش اني عايز اقوم
اشمعنا حسيت بوجع ضهري و اني مقمتش من فتره غير وقت مجيت اكتب
نفس الاحساس بيجيلي وقت ميكون عندي معاد تسليم شغل
وقتها بقول لنفسي هو انا مش بروح الجيم ليه هو انا مش بسافر ليه
وقتها بقول انا عايز اشتري جيتار و بيانو هو ايه ماخرني
الحقيقه ان بعد كام ساعه و بعد مخلص الي ورايا الافكار دي بتروح لحالها و ارجع عادي
اسمع اغاني و اقرا
نزلت انهارده ستوري
٣ ستوريهات
فتحت الكاميرا و صورت الي قدامي
ونزلت لينك العقد علشان اسوق ليه
ده يعتبر شغلي انهارده
و كان اصعب مما تتخيلو
مش عارف ليه
مع ان من اسبوع كنت قاعد بتنطط من اسكندريه للقاهره و بشتغل و انا عالقهوه وبعمل ١٠٠ حاجه في نفسالوقت
مش عارف الاجابه و لا فاكر السؤال الي سالته
بس فاكر اني بحاول اعمل حاجه مش فاكر ايه هيا
يمكن بكره افتكر
